Le 15-te Conferentia International de Interlingua
Le 28 de julio - le 4 de augusto 2001
Arrangiate per le Union Mundial pro Interlingua
Le adresse del Conferentia:
Wojewdzki Miedzyszkolny Osrodek Sportu Rekreacji Rehabilitacji (WMOSRiR)
PL-80 266 Gdansk Wrzeszcz, ul. Grunwaldszka, 244, Polonia
Commission Organisatori: Barbara Rubinstein (Svedia), Kjell Rehnstrm (Svedia), Bertil Palmquist (Svedia).
Le introduction del arrangiatores in le "Libretto Conferential" :
Un conferentia historic in un urbe historic. Le circumstantias del 15-te Conferentia International de Interlingua non pote esser melior. Le Union Mundial pro Interlingua vos da omnes le benvenita de Gdansk pro un septimana special in compania international.
Ante precisemente 50 annos, interlingua esseva publicate como le resultato de 27 annos de labor scientific del International Auxiliary Language Association. Quasi como un dono al jubileo, le Consilio de Europa e le Union Europee ha decidite facer 2001 le Anno Europee de Linguas, ubi on pote attraher le attention del europeos al ricchessa de haber e de cognoscer plure linguas. Il es in iste spirito que le motto de iste conferentia historic ha devenite "Le Anno Europee de Linguas".
Interlingua ha multo a offerer al europeos - e al resto del mundo - como instrumento moderne de communication international. Le conferentia assembla personas e organisationes de tote le mundo qui labora activemente pro diffunder le cognoscentia e uso de interlingua in lor regiones. Iste septimana omne le cerebros va laborar pro pensar al futuro, durante que on celebra le passato. Le conferentia es un foro aptissime pro excambiar experientias, discuter nove ideas, trovar nove faciettas e argumentos, lassar se inspirar, laborar effectivemente e recargar su batterias personal in agradabile compania sub circumstantias tranquille e inspirante. Il es forte spero del arrangiatores que vos omnes vole contribuer activemente pro assi inspirar nos omnes, divider con nos vostre experientias (positive e negative) de vostre labor con interlingua e assi assecurar que le resultatos concrete de iste conferentia essera si grande e si numerose como possibile. Es un situation unic haber assemblate tante personas de tante paises - un situation que debe esser exploitate pro discussiones, discursos, labor etc. Vos es omnes claves al successo del conferentia. Participa in illo con humor e ingagiamento, assi que nos omnes al retorno pote pensar retro al "spirito de Gdansk".
Benvenite a vos omnes in Gdansk pro un septimana optimal al 15-te Conferentia International de Interlingua! E memora: Nos parla interlingua durante iste septimana - non linguas national!
Qual personas participa in le conferentia? Solmente membros del Union Mundial pro Interlingua pote participar in le conferentia. Durante le inauguration e le postmeridie public anque non-membros del UMI es admittite. Le arrangiatores del conferentia pote permitter a personas interessate in interlingua esser presente in certe sessiones como auditores qui non participa in le debattos.